Республикалық табиғатты қорғау бастамалары – «Таза Қазақстан» және «Парктер шеруі – 2026» акциялары аясында Қарой ауылдық округіндегі «Іле-Балқаш» мемлекеттік табиғи резерватының жолбарыстарды оңалдыру орталығы аумағында «Киелі мекен» атты тазалық іс-шарасы ұйымдастырылды.
Аталған шараны резерваттың «Экологиялық ағарту, рекреация және туризм» бөлімінің мамандары ұйымдастырып, оған Қазақ ұлттық аграрлық зерттеу университетінің орман шаруашылығы мамандығы бойынша өндірістік практикадан өтіп жатқан студенттері мен «Үлгілі» орта мектебінің 6 «Ә» сынып оқушылары қатысты.
Іс-шара барысында қатысушылар табиғи аумақты қоқыстан тазартып, қоршаған ортаны қорғауға бағытталған нақты жұмыстар жүргізді. Сонымен қатар, шараның ерекше мәні – оқушылардың табиғатқа деген сүйіспеншілігін шығармашылық форматта көрсетуінде болды. Олар флешмоб ұйымдастырып, туған жерге арналған ән орындап, көтеріңкі көңіл-күй сыйлады.
«Киелі мекен» акциясы – жас ұрпақтың туған жерге деген құрметін арттырып, табиғатты аялау мәдениетін қалыптастыруға бағытталған маңызды бастама.