Ағымдағы жылдың 7ші желтоқсан күні Қарой ауылдық округіне қарасты Мәдениет үйінде Іле-Балқаш мемлекеттік табиғи резерватының ұйымдастыруымен жергілікті халықпен кездесу өткізілді. Кездесу барысында Қазақ ұлттық аграрлық зерттеу университетінің қауымдастырылған профессоры, Іле-Балқаш өңірінде орман өсіру бағыты бойынша сарапшы Кертешев Талғат Сейітұлы , БҰҰ Даму Бағдарламасы жобасының аумақтық сарапшысы, Алматы облысы әкімшілігінің қоғамдық кеңесінің мүшесі Досымбеков Тынышбай Досымбекұлы, «Сирек кездесетін өсімдіктер мен жануарларды қорғау» қоғамдық қорының сарапшысы Байбулов Айбек және Қарой ауылдық округінің әкімі Болатов Әділ Бексұлтанұлының қатысумен халық алдында резерват аумағындағы басты мәселелері (су, жайылымдық жер, орман өрті және қасақаналық аңшылық т.б) талқыға түсті. Резерваттың биылғы жасалған жұмыстары жайлы қысқаша есеп беріліп, келер жылғы жоспардағы жұмыстар жайлы айтылып өтті.